බස්නාහිර පළාත බාර ජේෂ්ඨ නියෝජ්‍ය පොලිස්පති දේශබන්දු තෙන්නකෝන් අනීතිකව දෙන ලද නියෝගයක් සම්බන්ධයෙන් පොලිස් විශේෂ විමර්ශන ඒකකය පවත්වන ලද විමර්ශනයකින් කරුණු සහිතව අනාවරණය කර ගෙන තිබේ.
මෙසේ අනාවරණය කර ගෙන තිබෙන්නේ ජනාධිපති මන්දිරයේ තිබී සොයා ගන්නා ලද රුපියල් එක් කෝටි හැත්තෑ අට ලක්ෂයකට අධික මුදල සම්බන්ධයෙන් ජේෂ්ඨ නියෝජ්‍ය පොලිස්පතිවරයා විසින් කොටුව පොලිස් ස්ථානාධිපතිවරයා වෙත ලබා දෙන ලද අනීතික නියෝගයකි. එවැනි මුදලක් ලැබුණු වහාම පොලිසිය විසින් අධිකරණයට බාර දිය යුතු වුවත් එසේ නොකරන ලෙස කරන ලද නියෝගය සම්බන්ධයෙනි. ජනාධිපති මන්දිරයෙන් සොයා ගත් එම මුදල අධිකරණයට බාර නොදී මහජන ආරක්ෂක ඇමති ටිරාන් අලස්ට බාර දෙන ලෙස කොටුව පොලිස් ස්ථානාධිපතිවරයාට නියෝග කර ඇත.
එහෙත් කොටුව පොලිස් ස්ථානාධිපතිවරයා එසේ නොකර ජේෂ්ඨ නියෝජ්‍ය පොලිස්පතිගෙන් ලද අනීතික නියෝගය සම්බන්ධයෙන් රාජකාරී සටහන් යොදා තිබිණි. එම මුදල සම්බන්ධයෙන් මේ වනවිට පැවැත්වෙන අධිකරණ විමර්ශනවලදී පොලිස් විශේෂ විමර්ශන ඒකකය මගින් අදාළ සියලු තොරතුරු අද (05) කොටුව මහේස්ත්‍රාත් අධිකරණයට හෙළිකර තිබේ.
