මෙරටට ආනයනය කරනු ලබන සහල් මිල වරායෙන් ගොඩබෑමේදී කිලෝවක් සඳහා පසුගිය මාර්තු මාසයේදී රුපියල් 105කට වඩා පහත වැටී තිබී ඇති බව නවතම මහ බැංකු වාර්තාවලින් අනාවරණය වේ.
එහෙත් මාර්තු, අප්‍රේල් මාසවලදී සහල් කිලෝවක සිල්ලර මිල ගණන් නාඩු කිලෝව රුපියල් 198ක් සහ සම්බා කිලෝව රුපියල් 206ක් වී තිබූ බව මහ බැංකුවේ එම නිල වාර්තාවේ දැක්වේ. මේ අනුව ආනයනික සහල් කිලෝවකින් රුපියල් 100ට ආසන්න මිලක් පාරිභෝගිකයාගෙන් කොල්ල කා ඇති බව සනාථ වේ.
පසුගිය 2021 වර්ෂයේ මාර්තු මාසයේදී මෙරටට ගෙන්වන ලද සහල් කිලෝවක් වරායෙන් ගොඩබෑමේදී රුපියල් 178කට ආසන්නව තිබී ඇත. 2020 මාර්තු මාසයේදී එය රුපියල් 105කට ආසන්න මිලක් දක්වා පහත වැටී තිබෙන පසුබිමක මෙරට වෙළෙඳ පොළේ සහල් මිල ඉහළ මට්ටමක තිබී ඇත.
මෙම තොරතුරු හෙළිවන්නේ මහ බැංකුව විසින් නිකුත් කරන සතිපතා ආර්ථික දත්ත වාර්තාවේ මැයි 27 වන දින නිකුත් කළ නිල ලේඛනයෙන්ය.
